लहान मुलांना करोना संसर्गाचा किती धोका?; संशोधनात झाला \'हा\' दावा

लंडन:

जगभरात करोनाच्या संसर्गाचे थैमान सुरूच आहे. भारतातील करोनाच्या संभाव्य तिसऱ्या लाटेत लहान मुलांना अधिक धोका असल्याचा इशारा देण्यात आला आहे. अशातच ब्रिटनमधून एक चांगली बातमी समोर आली आहे. ब्रिटनमधील सार्वजनिक आरोग्य आकडेवारीच्या विश्लेषणातून महत्त्वाची माहिती समोर आली आहे. लहान मुले आणि किशोरवयीन मुलांमध्ये करोनाच्या विषाणूने गंभीर आजारी होण्याचा आणि मृत्यू होण्याचा धोका कमी असल्याचे समोर आले आहे.

युनिर्व्हसिटी कॉलेज लंडन, युनिर्व्हसिटी ऑफ ब्रिस्टल, युनिर्व्हसिटी ऑफ यॉर्क आणि युनिर्व्हसिटी ऑफ लिव्हरपूलच्या संशोधकांनी हा अभ्यास केला आहे. संशोधकांनी १८ वर्षाखालील कमी वयाच्या मुलांसाठी लसीकरण मोहिमेबाबतही सुचना केली आहे. संशोधकांनी तीन अभ्यास-संशोधनाचे विश्लेषण केले आहे. एका अभ्यासानुसार, इंग्लंडमधील १८ वर्षाच्या कमी वयोगटातील २५१ लोकांना फेब्रुवारी २०२१ पर्यंत करोनावरील उपचारासाठी अतिदक्षता विभागात दाखल करण्यात आले होते.

वाचा: चिंता वाढली! डेल्टा वेरिएंटपेक्षा 'हा' वेरिएंट अधिक धोकादायक?

वाचा: इस्रायलमध्ये 'या' लशीचा प्रभाव घटतोय?; मास्क व इतर नियम केले होते शिथिल

याआधीच एखाद्या आजाराने ग्रस्त असलेल्या युवकांना, बालकांना करोनाची लागण झाल्यास गंभीर आजारी होण्याचा धोका असल्याचे संशोधकांनी सांगितले. संशोधकांच्या दाव्यानुसार, ब्रिटनमध्ये ४७ हजार ९०३ लोकांपैकी एक किशोरवयीनला सार्स सीओव्ही-२ ची बाधा होण्याचा आणि आयसीयूमध्ये दाखल होण्याची शंका होती. एका अन्य संशोधनानुसार, इंग्लंडमध्ये कोविड-१९ मुळे २५ मुले आणि किशोरवयीन मुलांचा मृत्यू झाला होता. जवळपास चार लाख ८१ हजार लोकांपैकी एक अथवा दहा लाख संसर्गबाधितांमागे दोघांनाच मृत्यूचा धोका होता.

वाचा: भारतात करोनाचा जोर ओसरला; जगभरात करोना मृत्यू दरात घट

या दोन्ही संशोधनाचे प्रमुख संशोधक प्रा. रसेल वाइनर यांनी सांगितले की, नवीन संशोधनानुसार, लहान मुलांमध्ये, किशोरवयीन मुलांच्या गटामध्ये सार्स-सीओवी-२ मुळे गंभीर आजार, मृत्यू होण्याचा धोका कमी आहे. तिसऱ्या संशोधनानुसार, ५५ रिसर्च पेपरचे (संशोधनांचे) विश्लेषण केल्यानंतर समान निष्कर्ष समोर आले.